Bura Time

Kaaiynat aik bahot hi pecheeda jagah hai. Laikin hum jo yaha karnay aey hai woh kaafi simple hai. Hamay yaha career bananay beja gaya hai.

Laikin career banana itna asaan kaam nahi. Kaafi hurdles hotay hai career bananay may. Jaisay baaz logo ko tu yeh bhi pata nahi hota k hum yaha career bananay aey hai. Magar career k parwan charhnay ko jo sab se barha khatra lahaq hota hai woh Buray Time ka phenomena hai.

Buray Time ko kuch is tarah se bayan kia jaa sakta hai: Insan ki zindagi ka woh pehr jis may usay apni naani, daadi, par-naani, par-daadi sab yaad aa jatay hai, bil-tarteeb.

Buray Time ka koi muqarara mudat nahi hai. Yeh 10 saal se lay kar tamaam umri ho sakta hai. Yaha may yeh batata chaloo k Buray Time ko Dukhi Shakhseat har giz na samjha jaey. Woh aik alag phenomena hai. Bura Time beruni halaat se banta hai, jabke Dukhi Shakhseat androoni kefeat hai. Dono may zameen aasman ka farq hai. Buray Time walay shakhs ko khushi ki talash hoti hai, jabke Dukhi Shakhseat walay dukh par paltay hai.

Ba-zahir aisa lagta hai k Bura Time bahot hi chaotic aur violent hota ho ga. Such tu yeh hai k jitnay orgazanized tareeqay se aur jis patience k saath Bura Time kaam karta hai, shayad hi dunya may kuch itnay smooth andaaz may hota ho ga. Aik tarah se khoobsoorti hoti hai is may. Haa, zahiri taur par sab bahot chaotic nazar atha hai, laikin agar poori tasweer ko deka jaey tu har chiz aik rhythm k mutabiq harkat kar rahi hoti hai. Har chiz ka aik hi maqsad hota hai. Aap ka din pichlay din se ziada choda howa banana. Laikin yeh maqsad aisa nahi hota jaisay aik janwar apnay shikar par jhapatta hai. Balkay aik bahot hi high-tech karkhanay jaisa hota hai. Jaisay hi aik product karkhanay ke aik khaas hisay tak puhunchta hai, waha maujood machinery pooray indifference k saath us par kaam karti hai aur usay aagay dusray hisay ko bejti hai.

Buray Time se mukhtalif log mukhtalif tarah se deal kartay hai. Laikin kuch riksho k driver is ka hal kuch is tarah se bayan kartay hai, jo k un k riksho par tehreer kia gaya hota hai:

“Tamaam masayl ka hal, bistar baandh k tableegh markaz chal”

Dusra hal:

“Aap k tamaam masaayl ka hal. 100% guarantee k saath. Aaamil Bangali Baba”

Teesra hal:

“Ghutno ka dard, zehni inteshar, be-auladi, bawaseer, har qisam k masayl k leay tashreef laey, Al-Qadir dawaakhaana”

Chauta hal:

Yeh painting k soorat may hota hai. Kisi shakhs ko bahot violent halat may dekaya gaya hota hai. Hath-karhia torhtay hoay aur khoon may lat pat. Is may baghi bannay ki taraf ishara hota hai.

Paanchwa hal:

Yeh umooman kisi ghamgeen sher ki soorat may hota hai. Jis may zindagi se koi umeed na raknay ka dars dia gaya hota hai. Aik misaal mulahiza ho:

Ay zindagi humay tum se koi tamana kab hai
Hum tu is aas par jeetay hai k marna kab hai

Maafi chahta hoo, agar may nay aap ko dukhi kar dia. Khair, umooman Buray Timers yeh paancho hal yakay baad deegray try kartay hai. Aik aam Bura Timer aap ko is qisam ki guftgoo kartay hoay sunaey day ga:

“Aaj hamari mushkilat itni q barh gaey? Yeh sab deen se duri ki waja se hai.”

“Behen, mujay tu lagta hai meray khawand par kisi nay jadoo tona kia hai.”

“Yeh dek yeh manjan may nay 20 rupay may lia hai, bus may aik shakhs bech raha tha. Is se daanto k tamaam takaleef dur ho jaey gay”

“Kutay ke bachay, rasta de, nahi tu lun par charha dou ga”

“Dost hi nay dagha di, dushman se kia gila
Hum tu waha doobay jaha paani kam tha”

Bura Time mehez infiradi nahi hota. Aik riasat bhi Buray Time may mubtala ho sakta hai. Aik riasat Buray Time may mubatala ho jaey tu us mulk k shehrio k Buray Time may mubtala honay k 50 feesad imkanat ziada ho jatay hai. Aur 50 feesad se ziada shehrio par Bura Time aa jaey tu riasat par Bura Time aanay k imkanat 75 feesad ziada ho jata hai. Khair, yeh aik alag mouzou hai. Jis ko hum kisi aur din zer-e-behes laey gay.

Advertisements
This entry was posted in Uncategorized and tagged , , , , , , , , , , . Bookmark the permalink.

3 Responses to Bura Time

  1. Pingback: Bura Time | Tea Break

  2. Sakib Ahmad says:

    رومی رسم الخط میں اردو پڑھنا بہت مشکل ہے- اگر آپ اردو کو اردو رسم الخط میں لکھتے تو بہتر تھا

  3. Najeeb says:

    Not a tech-savvy person. Google transliteration par koshish ki Urdu rasm-ul-khat may convert karnay ki, but it was too bothersome. Maazrat chahta hoo if it was painful reading this.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s